Fevralın 28-də Fizika və Elektroenergetika fakültəsində Tələbə-Elmi Cəmiyyətinin elmi seminarı keçirildi.
Seminarda Elm və innovasiyalar üzrə prorektor, prof. Ramazan Məmmədov, Universitet TEC-in elmi rəhbəri, dos. İslam Paşayev, Fizika və Elektroenergetika fakültəsinin dekanı, dos.Tamilla Əhmədova, TEC-nin fakültə üzrə elmi rəhbəri, dos. Samir Orucov və digər fakültələrin TEC-nin üzvləri iştirak etdilər.
Seminarı giriş sözü ilə Universitet TEC-nin elmi rəhbəri, dos. İslam Paşayev açaraq bildirdi ki, Rusiyanın Voronej şəhərində keçiriləcək "XXI əsrin Gənclik və Elm: nailiyyətlər və perspektivlər" adlı Beynəlxalq elmi-praktiki konfransında göndərilən məqalələrin və elmi yeniliyi olan TEC-in üzvülərinin məruzələrinin fakültələr üzrə seminarlarda müzakirəsi nəzərdə tutulub. Bunun üçün də bütün fakültələrdə seminarlarımız davam etdiriləcək. Öncə Filologiya fakultəsində bu gün isə Fizika və Elektroenergetika fakültəsində keçirilən seminarın əsas məqsədi elmi yeniliyi olan qabaqcıl tələbələri yaxından tanımaq, onlara bu sahədə köməklik göstərməkdir.
Seminarda çıxış edən Elm və innovasiyalar üzrə prorektor, prof. Ramazan Məmmədov tələbələrin elmin inkişafında və elmə olan marağının artırılmasında bu cür seminarların önəmli rolu olduğunu vurğuladı. O, dahi Azərbaycan şairi Nizami Gəncəvinin məşhur kəlamını dilə gətirdi: “Qüvvət elmdədir başqa cür heç kəs, heç kəsə üstünlük eyləyə bilməz” .
Elmi seminarda tələbələrdən:
Camaləddinov Ramin (qr. T-56) “Alternativ enerjilər ”,
Hacıverdiyev Aslan (qr. T-56) “ Sürətli asinxron mühərriklərin idarə edilməsi və qoşulma sxem”,
Qasımova Lalə (qr. 545) “ Maye kristal əsasında hazırlanmış Şottki diodlarının tətqiqi”,
Səfərova Südabə (qr. 545) “ Lazer şualarının təsiri ilə Cu3,Ga5,Se9 kristallarından ikifotonlu fotokeçiricilik hadisəsinin tədqiqi ”,
Əsədova Şəbnəm (qr. 545) “ Lazer şuaların təsiri ilə Ga, Se kristalın rekombinasiya mərkəzinin tədqiqi”,
Qədirova Aytac (qr. 554) “ Alternativ enerji mənbələri”,
Şıxməmmədova Xuraman (qr. 554) “ Ozon qatının problemlərinin həlli yolları”,
İlyasova Zülfiyyə (qr. 554) “ Azərbaycan strateji enerji qaynaqlarının milli təhlükəsizliyə təsiri” mövzularında məruzələrlə çıxış etdilər.
Məruzələrdən sonra seminar iştirakçıları olan müəllim və tələbələr çıxış edənlərə suallar verdilər. Məruzələr ətrafında maraqlı diskussiyalar aparıldı.
Seminarda Fizika və Elektroenergetika fakültəsinin dekan, dos. Tamella Əhmədova çıxış edərək Fizika və Elektroenergetika fakültəsində keçirilən ilk elmi seminarın təşkilinə görə Universitet TEC-nin elmi rəhbəri, dos. İslam Paşayevə öz təşəkkürünü bildirdi. Onu da vurğuladı ki, elmi rəhbərlər tələbələrin qarşısına çıxan problemlərin həlli istiqamətində onlara yaxından kömək etməlidirlər. Çünki onlar gələcəyin magistrantları, alimləridir.
Növbəti seminarın 14.03.2015-ci il tarixində İqtisadiyyat və İdarəetmə fakültəsində keçiriləcəyi bildirildi.
Mətbuat xidməti
