1990-cı il yanvarın 19-dan 20-ə keçən gecə baş vermiş 20 Yanvar faciəsindən 29 il ötür. Həmin hadisələrdən illər ötsə də, xalq 20 Yanvar faciəsinin şəhidlərini unutmur, azadlığımız uğrunda canından keçənləri böyük ehtiramla yad edir, onların ruhunu daim əziz tutur. Ən çox diqqəti çəkən məqam isə Şəhidlər Xiyabanına gündən-günə artan insan axınıdır. Onlar 20 Yanvar qəhrəmanlarının əbədiyyətə qovuşduqları müqəddəs məkana üz tutaraq şəhidlərimizə sevgi və sayğılarını ifadə edirlər. Yanvarın 16-da universitetin Tələbə Həmkarlar İttifaqı və Tələbə Gənclər Təşkilatlarının təşəbbüsü ilə 20 Yanvar faciəsinin 29-cu ildönümü ilə əlaqədar olaraq, tələbələrimiz Sumqayıt şəhərindəki Şəhidlər Xiyabanı kompleksini ziyarət etdilər. Onlar Vətənin azadlığı və suverenliyi uğrunda canlarını fəda etmiş oğul və qızlarımızın xatirəsini yad etdilər, məzarları üstünə tər qərənfillər düzdülər.