Sumqayıt Dövlət Universitetində 1941-1945-ci illər müharibəsində qələbənin 70-ci ildönümünə həsr olunmuş tədbir keçirildi.
Əvvəlcə faşizm üzərində tarixi qələbə naminə canlarından keçmiş soydaşlarımızın, həmçinin sonrakı illərdə vəfat etmiş müharibə veteranlarının əziz xatirəsi bir dəqiqəlik sükutla yad edildi.
Universitetin Humanitar məsələlər üzrə prorektoru, dosent Nizami Namazov tədbiri giriş sözü ilə açaraq bildirdi ki, Azərbaycan faşizm üzərində tarixi qələbədə xüsusi fədakarlıq göstərmişdir. Bu şanlı qələbədə böyük payı olan Azərbaycan xalqı cəbhəyə 700 mindən çox oğul və qızını yola salıb. Onların təxminən yarısı döyüş meydanlarından geri qayıtmayıb. Həmin müharibə zamanı göstərdikləri igidliyə görə 130-a qədər Azərbaycan vətəndaşı Sovet İttifaqı Qəhrəmanı adına layiq görülüb. Xalqımız faşizmə qarşı müharibədə döyüş meydanları ilə yanaşı arxa cəbhədə də əsl şücaət və əzmkarlıq göstərib. İkinci Dünya Müharibəsində qələbənin qazanılmasında Bakı nefti əvəzsiz rol oynayıb. 1941-1945-ci illər müharibəsi zamanı Sovet İttifaqının sərf etdiyi neftin, benzinin əksər hissəsi Azərbaycanın payına düşüb. Berlinin alınması zamanı Almaniya səmasında cövlan edən 7 min hərbi təyyarənin yanacaqla təchizatı Azərbaycan benzini vasitəsi ilə təmin edilib.
Prorektor vurğuladı ki, ümummilli lider Heydər Əliyev hakimiyyətdə olduğu bütün dövrlərdə müharibə veteranlarının problemlərinə xüsusi diqqət yetirib və onlara hərtərəfli qayğı ilə yanaşılıb. Məhz Ulu öndərin ədaləti uca tutması sayəsində İkinci Dünya müharibəsi iştirakçılarının mənəvi haqları müstəqilliyin ilk illərində özlərinə qaytarıldı və 1994-cü ildən başlayaraq Azərbaycanda Qələbə günü qeyd olunmağa başladı. Ölkəmizdə müharibə veteranlarına dövlət qayğısı sosial siyasətin əsas istiqamətlərindən biridir. Ulu öndərin bu sahədəki siyasətini uğurla davam etdirən Prezident İlham Əliyev İkinci Dünya müharibəsinin ağır və çətin sınaqlarından keçmiş veteranların qayğılarına həssaslıqla yanaşır. Qələbə bayramı ərəfəsində dövlətimizin başçısının 1941-1945-ci illər Böyük Vətən müharibəsi iştirakçılarına, həlak olmuş və ya sonralar vəfat etmiş döyüşçülərin ailə üzvlərinə, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım verilməsi, bu günlərdə təqdimatı keçirilən Azərbaycanın Birinci xanımı, Heydər Əliyev Fondunun Prezidenti Mehriban xanım Əliyevanın dəstəyi sayəsində Arzu Əliyevanın layihəsi əsasında istehsal edilmiş “Hədəf Bakıdır. Hitler neft uğrunda döyüşü necə uduzdu” sənədli filmi tarixi keçmişimizə verilən ən yüksək dəyərlərdən biridir.
Universitetin qədim dünya və orta əsrlər tarixi kafedrasının müəllimi, tarix üzrə fəlsəfə doktoru Samir Kərimli “1941-1945-ci illər müharibəsi”ndə qələbənin təmin olunmasında Azərbaycanın rolu” mövzusunda məruzə ilə çıxış etdi.
Azərbaycan və xarici ölkələr ədəbiyyatı kafedrasının müdiri, əməkdar jurnalist Avtandil Ağbaba və Tədris hissəsinin əməkdaşı, şair-dramaturq Əvəz Mahmud Lələdağ belə tədbirlərin keçirilməsinin əhəmiyyətindən danışaraq söylədilər ki, İkinci Dünya müharibəsində şərəfli döyüş yolu keçən Azərbaycan övladlarının qəhrəmanlıq və şücaəti heç vaxt yaddaşlardan silinmir, gənc nəsl üçün əsl vətənpərvərlik nümunəsidir.
Mətbuat xidməti
