SDU-nun İqtisadiyyat və idarəetmə fakültəsində “Fakültənin intellektləri” adlı bilik yarışı keçirildi
Noyabrın 25-də İqtisadiyyat və idarəetmə fakültəsində Tələbə Gənclər Təşkilatı və Tələbə Həmkarlar İttifaqı Komitəsinin birgə dəstəyi ilə “Şuşa İli”nə həsr olunmuş “Fakültənin intellektləri” adlı bilik yarışı keçirildi.
Bilik yarışında iştirak edən fakültənin dekanı dosent Aynurə Yəhyayeva çıxış edərək yarışın keçirilməsinin əhəmiyyətindən bəhs etdi. Qeyd etdi ki, istedadlı gənclərin aşkara çıxarılması, onların elmi biliklərə həvəsləndirilməsi və rəğbətləndirilməsində bilik yarışlarının mühüm əhəmiyyəti var. Bu istiqamətdə Sumqayıt Dövlət Universitetinin tələbələri bilik yarışlarında uğurla iştirak edərək ölkə təhsilinə öz töhfələrini verirlər.
Dekan bilik yarışının təşkilinin tariximizi araşdırmaq və öyrənmək baxımından yüksək əhəmiyyət kəsb etdiyini, 2022-ci ilin “Şuşa İli”nin elan edilməsinin ölkə başçısı tərəfindən Şuşa şəhərinin Azərbaycan xalqı üçün tarixi əhəmiyyətinə və mədəni-mənəvi dəyərinə verilən qiymətin təzahürü olduğunu diqqətə çatdırdı.
Sonra müxtəlif mövzuları əhatə edən bilik yarışı iki mərhələdən ibarət olmaqla fərqli formatlarda - birinci mərhələdə 30 nəfər könüllü tələbənin iştirakı ilə test-yazılı formatda keçirildi. 30 sual şifahi olaraq səsləndirildi. İkinci mərhələdə isə əvvəlki mərhələdə iştirak edən tələbələr arasından seçilən ilk 15 nəfər turnirdə iştirak etdi. Onların arasından qaliblər müəyyənləşdirildi.
Qeyd edək ki, “Fakültənin intellektləri” layihəsi çərçivəsində yarışda iştirak edən 5 nəfər tələbə diplom və sertifikatla mükafatlandırılacaq.
Mətbuat xidməti
