Universitetimizdə "Microsoft” şirkətinin Azərbaycan üzrə nümayəndəsi Təhsildə Əməkdaşlıq meneceri Emin Axundovla tələbələrin görüşü keçirildi.
Görüşü universitetimizin Qiyabi, distant və əlavə təhsil üzrə prorektoru, dosent Qafar Atayev açaraq "Microsoft " şirkətinin Azərbaycandakı fəaliyyəti haqqında tələbələrə ətraflı məlumat verdi. Bildirdi ki, İnformasiya-kommunikasiya texnologiyaları (İKT) son illər sürətlə inkişaf edərək bütün sahələrdə və gündəlik həyatda insan fəaliyyətinin, sosial-iqtisadi münasibətlərin tərkib hissəsinə çevrilmişdir. İKT-nin ən yeni nailiyyətləri idarəetmə, təhsil, səhiyyə, biznes, turizm və bank xidməti kimi sahələrdə tətbiq edilərək, cəmiyyətin hər bir üzvünə mövcud imkanlardan faydalanmağa şərait yaradır. Bu baxımdan "Microsoft” şirkəti ölkəmizdə bir çox uğurlu layihələrə imza atır, inanıram ki, siz tələbələr bu müsabiqəyə qatılmaqla öz bilik və bacarığınızı nümayiş etdirəcəksiniz.
Görüşdə "Microsoft” şirkətinin Azərbaycan üzrə Təhsildə Əməkdaşlıq meneceri Emin Axundov tələbələrə Azərbaycanda keçiriləcək “Microsoft Imagine Cup” innovasiya müsabiqəsi ilə bağlı məlumat verdi. 2014-cü ildən başlayan bu müsabiqə “Oyunlar”, “İnnovasiyalar” və “Dünya vətəndaşlığı” kateqoriyalarından ibarət üç istiqamət üzrə, dünya finalında 33 komanda arasında Azərbaycanı təmsil etmiş NoObs komandası Spinal layihəsi ilə “İnnovasiyalar” nominasiyasında ikinci yerə layiq görülmüşdür. Qeyd etdi ki, bu müsabiqəyə qoşulmaq istəyən komanda 2016-cı ilin yanvarın 5-dək qeydiyyatdan keçə bilərlər. Milli təsnifat mərhələsinin hər bir kateqoriya üzrə olan qalibləri cari ilin aprel ayında onlayn rejimdə keçiriləcək beynəlxalq yarımfinal mərhələsində qalib gələn komanda 2016-cı ilin iyul ayında ABŞ-ın Sietl şəhərində təşkil ediləcək sonuncu – final mərhələsində Azərbaycanı təmsil etmək hüququ əldə edəcəklər.
Siz tələbələr yeni ideyalarınızla bu müsabiqəyə qatılmaqla əvvəlcə ölkəmizə daha sonra isə dünyaya yenilik gətirmiş olacaqsınız.
Görüş aktiv və maraqlı dialoq şəklində keçirildi və sonda prorektor, dosent Qafar Atayev tələbələr adından Emin Axundova dərin təşəkkürünü bildirdi.
Mətbuat xidməti
