Roof Academic Training-in nümayəndələri tərəfindən SDU tələbələri üçün “Xaricdə təhsil” mövzusunda infosessiya keçirilib
23-24 may 2024-cü il tarixlərində Sumqayıt Dövlət Universitetində Roof Academic Training şirkətinin nümayəndələri tərəfindən universitet tələbələri üçün “Xaricdə təhsil” mövzusunda infosessiya keçirilib.
Şirkətin Xaricdə təhsil şöbəsinin müdiri Vüsalə Mustafayeva iştirakçılara şirkət barədə geniş məlumat verərək xaricdə təhsil sahəsi üzrə təcrübələrindən, beynəlxalq reytinq sistemlərində yüksək yer alan universitetlərdəki təhsilin üstünlüklərindən, dünyanın top universitetlərinə qəbul qaydalarından, magistratura üzrə təqaüd proqramlarından, universitet dönəmində mübadilə fürsətlərindən, eləcə də gələcəyin ixtisaslarından danışıb. O, həmçinin xaricdə təhsil ilə maraqlanan universitet tələbələrinə öz tövsiyələrini verib.
İnfosessiya zamanı Roof Academic Training-in İcraçı direktoru Nabat Hüseynzadə təhsil şirkətinin müxtəlif partnyorlarla həyata keçirdiyi təqaüd layihələri, 2023-2024 təqaüd proqramına seçimin aparılması qaydaları barədə məlumat verib.
Roof Academic Training-in direktor köməkçisi Amil Babazadə təqaüd proqramlarının zəruriliyi və faydaları, o cümlədən şirkətin məzunlarının statistikası kimi mövzular haqqında geniş məlumat verib.
İnfosessiyanın sonunda tədbir iştirakçılarını maraqlandıran suallar cavablandırılıb.
