SDU-nun təmsilçisi REFRESH layihəsi çərçivəsində İspaniyaya səfər edib
3-7 iyun tarixlərində Sumqayıt Dövlət Universitetinin tərəfdaş olduğu və Azərbaycan Dövlət İqtisad Universitetinin (unec.edu.az) koordinatorluğu ilə həyata keçirilən Avropa Komissiyasının Erasmus+ proqramının “Azərbaycan universitetlərində yaşıl və dayanıqlı iqtisadiyyatın təkmilləşdirilməsi: bərpa olunan enerji və iqlim dəyişikliklərinin azaldılması – REFRESH” adlı layihə çərçivəsində İspaniya Krallığının Barselona Universitetinə (BU) səfər baş tutub.
Səfərdə Azərbaycan Dövlət İqtisad Universiteti (UNEC), Sumqayıt Dövlət Universiteti (SDU), Azərbaycan Texnologiya Universiteti (ATU), Gəncə Dövlət Universiteti (GDU), Mingəçevir Dövlət Universiteti (MDU) və Lənkəran Dövlət Universitetinin (LDU) nümayəndələri iştirak edib. Onlar təmsil etdikləri ali təhsil müəssisəsinin müvafiq fəaliyyəti və hədəfləri haqqında danışaraq, “REFRESH” layihəsi çərçivəsində görüləcək işlər barədə ətraflı məlumat veriblər.
Sumqayıt Dövlət Universitetindən Karyera və Məzunlarla İş Mərkəzinin direktoru Nəsibə Əmirbəyovanın iştirak etdiyi təcrübə səfəri zamanı BU-nun tarixi tədris binası, universitetin zəngin irsi ilə tanışlıq, eləcə də innovasiya, dayanıqlılıq, səhiyyə və mədəniyyət sahələrində fəaliyyət göstərən bir neçə rezident təşkilata ev sahibliyi edən Sant Pau Recinte Modernistaya ekskursiya təşkil olunub.
Ekskursiyadan sonra Barselona Universitinin Dayanıqlılıq və İqlim Fəaliyyəti üzrə prorektoru REFRESH layihəsinin konsorsiumunda yer alan 6 yerli ali təhsil müəssisəsinin nümayəndələri ilə COP29-un Azərbaycanda keçirilməsinin əhəmiyyəti haqqında müzakirə aparıb, universitetin keyfiyyət siyasətini təqdim edərək dayanıqlılığın önəmini vurğulayıb.
Səfər çərçivəsində iştirakçılar BU-nun Bərpa Olunan və Dayanıqlı Enerji üzrə magistratura proqramının məqsədləri, tədris planı, sillabusu, eləcə də kompetensiyalar, qəbul kriteriyaları və dərs planı, sessiyaların və praktiki məşğələlərin təşkili, tədris metodologiyaları, qiymətləndirmə sistemləri və tələbə dəstəyi xidmətləri kimi mövzularla yaxından tanış olublar. Bununla yanaşı, Dövri İqtisadiyyat və Dayanıqlılıq üzrə İxtisaslaşma proqramı haqqında da məlumat verilib.
Təcrübə səfərinin son günündə BU nümayəndələri tərəfindən "İnnovasiya Ekosistemlərinin Qurulmasında Universitet-Sənaye Əlaqələrinin Rolu" mövzusunda seminar keçirilib.
