Sumqayıt Dövlət Universitetində Karyera və Məzunlarla İş Mərkəzinin təşkilatçılığı ilə məzunlarla görüşlər təşkil olunur. Sentyabrın 5-də Tarix və coğrafiya fakültəsi üzrə 2005-ci il buraxılış məzunları ilə görüş keçirildi.
Görüşdə fakültənin dekanı professor Adil Baxşəliyev çıxış edərək keçmiş məzunları salamladı, son illər universitetin beynəlxalq reytinqlərdə artan nüfuzundan, müasir dövrün tələblərinə cavab verən yüksək ixtisaslı kadr hazırlığından, tələbələr üçün yaradılan imkanlardan söhbət açdı və fakültədə son zamanlar həyata keçirilən yeniliklərdən danışdı.
Sonra universitetin Karyera və məzunlarla iş mərkəzinin direktoru Nəsibə Əmirbəyova çıxış edərək SDU-da Məzunlar Assosiasiyasının yaradılmasını və məzunları Assosiasiyaya üzv olmaqları üçün müraciət edə biləcəklərini diqqətə çatdırdı. Bildirdi ki, Assosiasiyanın yaradılmasında məqsəd məzunlarla işin təşkili, universitet-məzun əlaqələrini gücləndirmək və tədris ilə bağlı yenilikləri məzunlara çatdırmaqdır. Bu gün SDU-nun məzunları Azərbaycanın ictimai-siyasi həyatında öz töhfələrini verirlər.
SDU-nun Keyfiyyət təminatı və strategiya şöbəsinin rəhbəri Gülnar Cəfərova çıxış edərək universitetdə keyfiyyətin hərtərəfli təminatında təhsilalanların rolunu vurğulayaraq, hazırda təhsil sistemində gedən proseslər barədə məlumat verdi.
Məzunlar da çıxış edərək öz tələbəlik illərini, müəllimlərini yad edib xoş xatirələrini bölüşdülər, iş mühitində əldə etdikləri uğurlardan danışdılar.
Görüşün sonunda xatirə şəkilləri çəkildi.