Oktyabrın 18-I İtaliyanın Milan şəhərində keçirilən "75-ci Beynəlxalq Astronavtika Konqresi" çərçivəsində Sumqayıt Dövlət Universitetinin (SDU) SABAH Qruplarının Kibertəhlükəsizlik ixtisası üzrə 1-ci kurs magistrantı Mətanət Əhmədova “E8 Multilingual Astronautical Terminology” sessiyasında çıxış edib. Mətanət Əhmədova “Cosmos+Alphabet=AlCosbet” adlı məqaləsində “AlCosbet” adında innovativ masaüstü kart oyununu tanıdıb. Bu oyun kosmik terminlərin əyləncəli bir şəkildə öyrənilməsini təmin edir və iştirakçılara həm biliklərini paylaşmaq, həm də yeni terminləri öyrənmək imkanı tanıyır. Məqalənin məqsədi oyun əsaslı öyrənmə metodundan istifadə edərək kosmik terminləri daha geniş auditoriyaya tanıtmaqdır. Çıxışçı təqdimatında oyun vasitəsilə biliklərin artırılmasının əhəmiyyətini vurğulayıb və bu yanaşmanın təhsil sahəsindəki yeniliklərə işıq tutduğunu qeyd edib.