Oktyabrın 18-də Sumqayıt Dövlət Universitetinin (SDU) rektoru Rüfət Əzizovun rəhbərlik etdiyi nümayəndə heyəti Lənkəran Dövlət Universitetinə (LDU) işgüzar səfər edib. LDU-nun rektoru, professor Natiq İbrahimov tərəfindən qəbul edilən SDU nümayəndələri iki ali təhsil müəssisəsi arasında əməkdaşlığın genişləndirilməsi məqsədilə bir araya gəlib. Görüşdə birgə elmi tədqiqatların həyata keçirilməsi, tədris proseslərinin təkmilləşdirilməsi və beynəlxalq platformalarda universitetlərin təmsilçiliyinin artırılması ilə bağlı fikir mübadiləsi aparılıb. Səfərin davamında SDU-nun Beynəlxalq əlaqələr üzrə prorektoru Könül Abaslı universitetlərin beynəlxalq reytinq sistemlərində, xüsusən QS reytinqində iştirakı ilə bağlı LDU-nun professor-müəllim və tələbə heyətinin qarşısında təqdimatla çıxış edib. Daha sonra nümayəndə heyəti universitetin auditoriyalarına, kitabxanasına, tələbə yataqxanalarına və digər bölmələrə baş çəkərək tələbə və tədris mühiti ilə yaxından tanış olublar. Rektor Rüfət Əzizov LDU-da son illərdə yaradılan müasir infrastrukturun böyük zəhmətin nəticəsi olduğunu vurğulayaraq, iki universitet arasında əməkdaşlığın əhəmiyyətini qeyd edib. O, həmçinin professor Natiq İbrahimova göstərilən qonaqpərvərlik üçün təşəkkürünü bildirib. Səfər çərçivəsində Rüfət Əzizov “Türk dövlətləri tərkibində inteqrasiya prosesləri: Müasir çağırışlar və hədəflər” mövzusunda keçirilən beynəlxalq elmi-praktiki konfransda çıxış edib.