Oktyabrın 23-də Sumqayıt Dövlət Univeritetində Tələbə Gənclər Təşkilatının (TGT) təşkilatçılığı ilə I kurs tələbələri üçün “TGT nədir?” layihəsinin təqdimatı keçirildi.Əvvəlcə Azərbaycan Respublikasının Dövlət Himni səsləndirildi və ərazi bütövlüyümüz uğrunda canından keçən Vətən övladlarının xatirəsi bir dəqiqəlik sükutla yad edildi.Təqdimatda universitetin Sosial məsələlər və ictimaiyyətlə əlaqələr üzrə prorektoru dosent Elmar Xəlilov çıxış edərək gənclərin ölkəmizin inkişafındakı rolundan və ölkədə aparılan uğurlu dövlət gənclər siyasətindən danışdı. Bildirdi ki, bu gün gənclərə yüksək diqqət və qayğı göstərilir. Bunun nəticəsi olaraq gənclərimiz elm, təhsildə, müxtəlif idman yarışlarında, mədəniyyət və digər sahələr üzrə keçirilən müsabiqələrdə fəal iştirak edərək uğurlu nəticələr əldə edirlər. Sevindirici amildir ki, Sumqayıt Dövlət Univeritetinin tələbə gəncləri də Azərbaycan gəncliyinin inkişafı üçün öz töhfələrini verirlər. Bu gün Sumqayıt Dövlət Univeriteti təkcə peşəkar kadrların yetişdirilməsi ilə kifayətlənmir, həmçinin istedadlı tələbələrin üzə çıxarılması, onların asudə vaxtlarının səmərəli keçirilməsi üçün hər cür şərait yaradır. Bu baxımdan Sumqayıt Dövlət Universitetinin Tələbə Gənclər Təşkilatı tələbələrin ictimai həyatda fəallığının artırılması istiqamətində də əhəmiyyətli addımlar atır. Sonra Aynabənd qrupunun təqdimatında  bir-birindən maraqlı ifalar dinlənildi. Tədbirdə Azərbaycan Tələbə Gənclər Təşkilatları İttifaqının (ATGTİ) Üzvlərlə iş üzrə meneceri Gülşən Qubadova çıxış edərək gənclər təmsil etdiyi təşkilatın missiyası, gördüyü işlər, keçirdiyi müxtəlif tədbirlər barədə məlumat verdi . Bildirdi ki, ittifaqın məqsədi ali və orta ixtisas məktəblərində təhsilin inkişafına kömək olmaq, tələbələrin maraqlarını təmsil və müdafiə etmək, respublikanın ictimai, mədəni və sosial-iqtisadi həyatında onların fəal iştirakına şərait yaratmaqdan ibarətdir.Sonra ATGTİ –nin fəaliyyətlərini əks etdirən videoçarx nümayiş olundu. SDU-nun Tələbə Gənclər Təşkilatının (TGT) sədri Rəvan Paşayev TGT üzvlərinin universitetin və ölkənin ictimai həyatında daha fəal iştirakları ilə bağlı icra olunan tədbirlər haqqında geniş çıxış etdi. TGT-nin Musiqi klubunun sədri Nəzrin Həsənova təşkilat klublarının fəaliyyəti barədə ətraflı məlumat verdi.