Çin Xalq Respublikasının Heksi Universitetinin nümayəndə heyəti Sumqayıt Dövlət Universitetinə (SDU) işgüzar səfər edib.Qonaqları giriş sözü ilə salamlayan SDU-nun rektoru Rüfət Əzizov ölkənin böyük sənaye şəhəri olan Sumqayıtın müxtəlif dövrlərdəki inkişafından və şəhərin yeganə ali təhsil müəssisəsi olan Sumqayıt Dövlət Universitetinin fəaliyyəti, missiyası, strategiyası, strateji istiqamətləri və hədəfləri barədə məlumat verib. Son illər ölkədə təhsilin inkişafı istiqamətində mühüm addımlar atıldığını və bunun nəticəsi olaraq SDU-da  təhsilin məzmununun yenilənməsi üzrə mühüm nailiyyətlər əldə olunduğunu diqqətə çatdırıb.SDU-nun strateji hədəflərindən birinin beynəlmilləşmə olduğunu nəzərə çatdıran Rüfət Əzizov bu istiqamətdə beynəlxalq əməkdaşlıq əlaqələrinin inkişaf etdirilməsinin vacibliyini qeyd edib. Bildirib ki, SDU beynəlxalq əlaqələrini gündən-günə genişləndirərək müəllim-tələbə mobilliyi istiqamətində mühüm uğurlu addımlar atır.Bundan sonra Sumqayıt Dövlət Universitetinin geniş tədris imkanları və zəngin maddi-texniki bazasını nümayiş etdirən videoçarx nümayiş olunub.Heksi Universitetinin vitse-prezidenti, professor Gao Rong çıxış edərək səmimi qəbula görə universitet rəhbərliyinə minnətdalığını bildirib, Azərbaycanla Çin arasında olan dostluq, ikitərəfli əməkdaşlıq əlaqələrindən söz açaraq Sumqayıt Dövlət Universiteti ilə Heksi Universiteti arasında qarşılıqlı mübadilələrin həyata keçirilməsi imkanlarından məmnunluğunu ifadə edib.O, Heksi universitetinin tarixi, beynəlxalq əlaqələri barədə ətraflı məlumat verərək dünyanın müxtəlif təhsil və elm ocaqları ilə birlikdə həyata keçirilən layihələr və proqramlardan bəhs edib. Ardınca Heksi Universitetinin tarixi, beynəlxalq əlaqələri, elmi-tədqiqat fəaliyyətini əks etdirən videoçarx nümayiş olunub.Görüşdə qarşılıqlı maraq doğuran, faydalı əməkdaşlığın yaradılması barədə geniş fikir mübadiləsi aparılıb.Tələbə-müəllim mübadiləsi, birgə elmi tədqiqat məsələləri müzakirə olunub.Daha sonra qonaqların universitetin kampusu ilə tanış olmaq imkanı olub.