4 noyabr 2024-cü il tarixində Qazaxıstanda rəsmi işgüzar səfərdə olan Sumqayıt Dövlət Universitetinin (SDU) rektoru Rüfət Əzizov rəhbərlik etdiyi nümayəndə heyəti ilə Abay adına Qazax Milli Pedaqoji Universitetinin (QMPU) Beynəlmiləlləşmə və strateji inkişaf üzrə prorektoru Aygül İskakova, Beynəlxalq əməkdaşlıq departamentinin direktoru Bayan Saparqaliyeva, Beynəlxalq proqramlar və əməkdaşlıq şöbəsinin müdiri Aygerim Tavıldiyeva arasında görüş keçirilmişdir. Görüş zamanı tərəflər tələbə və müəllimlərin bacarıqlarının artırılması, təcrübə mübadiləsi və yeni akademik mobillik proqramlarının həyata keçirilməsinə yönəlmiş birgə təhsil və elmi layihələrin həyata keçirilməsi imkanlarını müzakirə etdilər. Qazaxıstan və Azərbaycandan olan tələbələrə akademik əlaqələrini genişləndirməyə, təhsil sistemləri ilə tanış olmağa imkan verəcək tələbə mübadiləsi proqramlarının başlanması perspektivlərinə toxunuldu. Sumqayıt Dövlət Universitetinin rektoru Rüfət Əzizov beynəlxalq əlaqələrin inkişafının vacibliyini vurğulayaraq, beynəlmiləl universitet olmağı hədəfləyən Sumqayıt Dövlət Universitetinin (SDU) xarici universitetlərlə əməkdaşlığa çox böyük önəm verdiyini diqqətə çatdırdı. Qloballaşma şəraitində tələbələr üçün akademik mobilliyin əhəmiyyətini nəzərə alaraq əməkdaşlığı genişləndirməyə hazır olduğunu bildirdi. Görüşün sonunda tərəflər arasında elmi əməkdaşlığın genişləndirilməsi istiqamətində fəaliyyət planının ilkin çərçivələri müəyyən olundu.