Ölkənin ən böyük təhsil platformalarından biri olan Təhsil Forumu - 2024 tərəfindən keçirilən möhtəşəm tədbirdə Sumqayıt Dövlət Universitetinin bir neçə əməkdaşı – Dil və Tərcümə Mərkəzinin direktoru Jalə Məmmədova, universitetin Klub müdiri Xalidə Quliyeva, həmçinin Dil və ədəbiyyat kafedrasının baş müəllimi Aynur Bağırova təhsildəki fəal və uğurlu fəaliyyətlərinə görə “Təhsil fəalı” döş nişanı ilə təltif ediliblər. Forum Bakı, Sumqayıt və ölkənin digər rayonlarından gələn çoxsaylı müəllimlərin iştirakı ilə “Müəllimlər Günü”nə həsr edilmiş tədbir çərçivəsində keçirilib. Təhsil eksperti Nadir İsrafilov çıxışında Təhsil Forumu platformasının beş illik uğurlu fəaliyyəti haqqında danışaraq, onun təhsildə yaratdığı müsbət dəyişikliklərdən bəhs edib. Tədbirdə eyni zamanda professor Şahlar Əsgərov, BDU-nun professoru Mövsüm Alışov, ADPU-nun elmi işçisi və respublikanın əməkdar müəllimi Zülfiyyə Vəliyeva da çıxış edərək müəllimləri təbrik edib, onlara gələcək fəaliyyətlərində müvəffəqiyyətlər arzulayıblar.