2024-cü ilin Alqarış qrant müsabiqəsinin qalibləri, Sumqayıt Dövlət Universitetinin (SDU) Avtomatika və mexanika kafedrasının müdiri, professor Cavanşir Məmmədov və Energetika kafedrasının dosenti Nadir Hacıbalayev noyabrın 2-dən 11-dək Kazan Dövlət Energetika Universitetində (KDEU) elmi ezamiyyətdə olublar. Bu səfər iki universitet arasında təhsil və elmi əməkdaşlıq əlaqələrinin genişləndirilməsi məqsədini daşıyırdı. Əməkdaşlarımız ilk olaraq Kazan Dövlət Energetika Universitetinin “Elektrotexnikanın nəzəri əsasları” və “Elektrotexniki komplekslər və sistemlər” kafedralarının akademik heyəti ilə görüşüb, müasir tədris auditoriyaları, innovasiya və mühəndis mərkəzləri, eləcə də Tatar Enerji Dövlət Şirkətinin dəstəyi ilə yaradılmış qabaqcıl laboratoriyalarla tanış oldular. Onlar həmçinin BAUR firmasının yüksək gərginlik avadanlıqları laboratoriyasını ziyarət etdilər. Noyabrın 5-dən 8-dək professor Cavanşir Məmmədov və dosent Nadir Hacıbalayev KDEU-nun tələbələri üçün müvafiq ixtisas qruplarında tədris proqramlarına uyğun olaraq “Layihə fəaliyyətinin əsasları” və “Elektrik nəqliyyat vasitələrinin enerjiyə qənaət edən elektrik maşınlarının riyazi modelləşdirilməsi” mövzularında məharət dərsləri keçdilər. Həm nəzəri mühazirələr, həm də laboratoriya və praktiki məşğələ dərsləri vasitəsilə yeni bilik və təcrübələrini paylaşdılar. Bundan əlavə, əməkdaşlarımız “Elektroenergetikanın və elektrotexnikanın inkişaf problemləri və perspektivləri” adlı VI Ümumrusiya elmi-praktiki konfransında iştirak etdilər. Professor Cavanşir Məmmədovun plenar iclasda “Моделирование процесса проектирования технопарка и его производства при ВУЗ-е” mövzusundakı təqdimatı konfrans iştirakçılarının marağına səbəb oldu. Konfransdan sonra Elektrik sistem və şəbəkələri kafedrasının müdiri, KDEU Texnoparkının rəhbəri dosent V.V. Maksimov əməkdaşlarımızı yeni rəqəmsal yarımstansiya laboratoriyası və texnoparkda həyata keçirilən startap layihələrlə tanış etdi. Onlar süni intellektlə idarə olunan obyekt tanıma manipulyatoru, elektrik xətlərindəki defektləri müəyyən edən pilotsuz uçan aparat və digər innovativ texnologiyaları yaxından izlədilər. Ezamiyyət çərçivəsində Sumqayıt Dövlət Universiteti və Kazan Dövlət Energetika Universiteti arasında təhsil və elm sahəsində əməkdaşlıq memorandumu imzalandı. Bu sənəd gələcəkdə iki universitet arasında birgə layihələr, akademik mübadilələr və innovasiya təşəbbüsləri üçün möhkəm təməl yaradacaq. Bu səfər həm beynəlxalq təcrübə mübadiləsi, həm də Azərbaycan və Rusiyanın elmi və tədris əməkdaşlığının dərinləşdirilməsi baxımından mühüm əhəmiyyət daşıyır.