Dekabrın 19-da Filologiya fakültəsində İlyas Əfəndiyevin 110 illik yubileyinə həsr olunmuş “İlyas Əfəndiyevin sənət dünyası” adlı tədbir keçirildi. Tədbiri giriş sözü ilə açan dosent Törə Məmmədova İ.Əfəndiyevin ədəbiyyat aləmində mövqeyi və yaradıcılığı barədə məlumat verdi. İ.Əfəndiyevin həyat və yaradıcılığını əks etdirən videoçarx nümayiş olunduqdan sonra tələbələrimiz “Billür sarayda”,“Hökmdar və qızı” əsərləri əsasında kiçik səhnəciklə çıxış etdilər. Ardınca “İlyas Əfəndiyev dramaturgiyasında Qarabağ mövzusu” üzrə çıxış edildi. Tədbirin iştirakçısı Dil və ədəbiyyat kafedrasının müdiri, dosent Böyükxanım Eminli çıxış edərək tədbir iştirakçılarının əməyini yüksək dəyərləndirdi. İ.Əfəndiyevin bədii əsərlərinin bu gün də aktuallığını itirmədiyini, gənclərdə milli-mənəvi və əxlaqi dəyərlər oyatdığını, tarix və milli dəyərlərin qorunmasında əhəmiyyətli olduğunu xüsusi vurğuladı. Tədbirin sonunda fəal tələbələrə yazıçının tədqiqatçısı Törə Məmmədovanın İ.Əfəndiyevin yaradıcılığından bəhs edən kitabı hədiyyə olundu.