10-12 dekabr tarixlərində K.Satbayev adına Qazaxıstan Milli Elmi-Tədqiqat Universitetinin Energetika və Maşınqayırma İnstitutunun nümayəndələri Sumqayıt Dövlət Universitetinə (SDU) səfər edib. İnstitutun direktoru, professor Kasım Elemesov və direktor müavini, dosent Dinara Başkanbayeva səfər zamanı universitet ilə tanış olub, tələbə-müəllim mobilliyi, birgə elmi-tədqiqat işlərinin aparılmasından bəhs ediblər. Kasım Elemesov tərəfindən, həmçinin SDU-nun müəllim və tələbələrinə alternativ enerji haqqında seminar keçirilib. Daha sonra, qonaqlar SDU-nun rektoru Rüfət Əzizovla görüşüb. Görüşdə universitetlərarası əməkdaşlıq istiqamətində müzakirələr aparılıb.Səfər çərçivəsində Kasım Elemesov və Dinara Başkanbayeva Sumqayıt Dövlət Universitetində keçirilən doktorantların və gənc tədqiqatçıların XXVII (NASCO XXVII) Respublika Elmi Konfransının açılış mərasimində iştirak ediblər.