Dekabrın 25–də Sumqayıt Dövlət Universitetində Mükəmməllik Mərkəzinin təşkilatçılığı və Riyaziyyat fakültəsinin Riyazi analiz və diferensial tənliklər kafedrasının təşəbbüsü ilə müasir Azərbaycan ədəbiyyatında tanınmış detektiv yazar Elbrus Kəlbiyevlə görüş keçirilib. Tədbiri giriş sözü ilə açan Mükəmməllik Mərkəzinin direktoru Əli Rzayev bu kimi görüşlərin gənc nəslin maariflənməsi istiqamətində verdiyi töhfələrindən danışaraq Elbrus Kəlbiyevin yaradıcılığından bəhs edib. Qeyd edib ki, Elbrus Kəlbiyevin əsərlərinin əhəmiyyəti təkcə detektiv janrında olmasından ibarət deyil, həmçinin onun əsərləri milli dəyərlər, dövlətçilik və vətənpərvərlik mövzularını da əhatə edir. Tədbirdə iştirak edən universitetin Riyaziyyat fakültəsinin dekanı, dosent Xalidə Həsənova, Tədris Metodiki Mərkəzinin direktoru, dosent Osman Hacıyev, kafedra müdiri dosent Xəyalə Seyfullayeva və fakültənin dosentləri İlqar Səfərli, Məmmədəli Məmmədov və digər əməkdaşlar yazıçının əsərləri barədə öz təəssüratlarını bölüşüblər. Tədbirin sonunda müəllif öz kitablarını imzalayaraq iştirakçılara hədiyyə edib.