İqtisadiyyat və idarəetmə fakültəsinin müxtəlif qruplarının tələbələri sərbəst iş tapşırıqlarının yerinə yetirilməsi məqsədi ilə müxtəlif müəssisələrə səfərlər edərək öz sahələrinə uyğun mövzularda dəyərli təcrübələr əldə ediblər. Tələbələr ilk növbədə "Azərbaycan Kağız və Karton İstehsalat Kombinatı" MMC-ni ziyarət edib, burada kağız istehsalı və emalı prosesləri ilə tanış olub, istehsal və idarəetmə strukturlarının necə işlədiyini müşahidə ediblər. 2 saylı Sumqayıt regional "ASAN xidmət" mərkəzinə edilən səfərdə isə tələbələr vətəndaşlara təqdim olunan xidmətlər və bu xidmətlərin təkmilləşdirilməsi üçün tətbiq edilən yeniliklər barədə ətraflı məlumat alıblar. Tələbələr daha sonra Qartal Tikinti Firmasına baş çəkiblər. Onlar tikinti sahəsinin idarə edilməsi və layihələrin effektiv şəkildə həyata keçirilməsi ilə bağlı təcrübələrini və bu sahə üzrə biliklərini genişləndirib. “ASSAN STP Panel”zavoduna edilən səfər də mühüm əhəmiyyət kəsb edib. Tələbələr istehsalın müxtəlif texnologiyaları ilə tanış olublar. "Kapial Bank" ASC Sumqayıt filialına səfər çərçivəsində bank xidmətləri, müştəri münasibətləri və maliyyə bazarlarında həyata keçirilən əməliyyatlarla bağlı praktiki biliklər əldə ediblər. "OBA Market" MMC və Bravo Supermarketə baş çəkən tələbələr pərakəndə ticarət və marketinq sahələrində təcrübə qazanıblar. Bu səfərlər tələbələrin tədris proqramını daha dolğun şəkildə başa düşmələrinə və onların gələcək karyeralarında daha uğurlu olmalarına böyük təsir göstərir.