Təhsil Nazirliyinin kollegiya iclasında bir çox məsələlər müzakirə olundu
Təhsil naziri Sumqayıt Dövlət Universitetinin rektoru professor Elxan Hüseynovu təhsilin inkişafindakı xidmətlərinə, ali təhsilli kadrların hazırlanması sahəsində səmərəli fəaliyyətinə və universitetin 55 illik yubileyi münasibətilə Fəxri fərmanla təltif etdi.
Noyabrın 15-də Təhsil Nazirliyində kollegiya iclası keçirildi.Tədbirdə kollegiya üzvləri ilə yanaşı, nazirliyin struktur bölmə rəhbərləri, ali təhsil müəssisələrinin rektorları iştirak etdilər.
Təhsil naziri cənab Mikayıl Cabbarov kollegiya iclasını giriş sözü ilə açaraq ölkə başçısının rəhbərliyi ilə təhsil sahəsində aparılan məqsədyönlü islahatlar nəticəsində əldə olunan uğurlar və qarşıya qoyulan vəzifələr barədə məlumat verdi.
Kollegiya iclasında Təhsil Nazirliyinin Elm, ali və orta ixtisas təhsili şöbəsinin müdiri Yaqub Piriyev 2017-2018-ci tədris ili üzrə ali təhsil müəssisələrinə tələbə qəbulunun yekunları, ali təhsil müəssisələrinin fəaliyyətini tənzimləyən bəzi qayda və əsasnamələrin təsdiqi barədə məruzə etdi.
Sonra təhsil nazirinin müavini Mətin Eynullayev Rektorlar Şurasının yaradılması haqqında məlumat verdi.
İclasda Bakı Dövlət Universitetinin rektoru Abel Məhərrəmov, Azərbaycan Dövlət Pedaqoji Universitetinin rektoru Cəfər Cəfərov və Gəncə Dövlət Universitetinin rektoru Yusif Yusibov rəhbərlik etdikləri ali təhsil müəssisələrinin tədris, elmi-tədqiqat, beynəlxalq əlaqələr və maliyyə-təsərrüfat fəaliyyətinə dair hesabatla çıxış etdilər.
Daha sonra ali təhsil müəssisələrinin əsas fəaliyyət istiqamətləri ilə bağlı çıxışlar oldu, gündəlikdəki məsələlərə dair təkliflər səsləndirildi.
Təhsil naziri cənab Mikayıl Cabbarov kollegiya iclasında məruzə olunan mövzularla bağlı fikirlərini bildirdi.
Kollegiya iclasında Rektorlar Şurasının Əsasnaməsi müzakirə olunduqdan sonra sənəd təsdiq edildi, eləcə də 2018-ci ildə ali təhsil müəssisələrinin prorektorlarının attestasiyasının keçirilməsi ilə bağlı qərar qəbul olundu.
İclasda Sumqayıt Dövlət Universitetinin 55, Naxçıvan Dövlət Universitetinin 50 illik yubileyləri münasibəti ilə rektorlar professor Elxan Hüseynova və Saleh Məhərrəmova Təhsil Nazirliyinin Fəxri fərmanı, həmçinin ölkə Prezidentinin sərəncamı ilə “Əməkdar müəllim” fəxri adına layiq görülən Xanhüseyn Kazımlıya dövlət təltifi təqdim olundu.
Mətbuat xidməti
